【Nia箍牙|隱適美】Vol.12 完成第10副牙套+矯正進度

終於都完成左10副牙套，身邊既朋友都睇得出有分別。不過條路仍然好漫長，皆因仲有48副要戴…我諗起都驚，而且而家仲要係第一階段(最多有四個階段)。

不過而家每戴一副都感覺到少少既改變，真係會feel到咬合有唔同左。

正面

就咁睇其實分別不大，不過仔細睇就會留意到架喇！

最明顯就係左邊隻虎牙向後移左，由細細既一條隙到而家差唔多移左半個牙位。

我終於見到入面隻側門牙喇！！！（感動）

呢個令人最興奮既改變，因為真係好明顯見到隻虎牙慢慢移向後，騰出一個位俾入面隻牙出黎。

見到呢個對比真係幾有滿足感。

我每戴完一副牙套都會影一set相，因為好想紀錄低d牙慢慢變靚既過程。雖然好煩，次次都要影一大餐，但之後自己睇返都幾過癮。

戴牙套都有一段時間，而家已經習慣左有牙套既生活。

除左換新牙套既頭1/2日咬chewy會覺得酸之外，其他日子都冇痛既感覺。

仲有，因為我要勾橡筋，所以每次打喊露都打得唔盡興！因為如果打得太大既話，橡筋就會彈開，呢個真係令我有d不爽。

依然好鍾意食野，但係會覺得除牙套好煩，所以好多時寧願唔食。但好可惜，我既體重冇輕過，搞錯呀。

繼續努力，下個目標：第20副！

純屬個人分享，只供參考，隱適美療程全屬自費。