Blog

上個月有段時間好想調整下自己既情緒，所以就離開左一個星期。不過講真，就算去到邊仍然每日心掛掛，冇辦法完全放鬆自己。

點都好，要先照顧好自己既情緒先可以繼續落去。

 

暫緩戴牙套

我今次去轉旅行除左要調整情緒，亦都解放左排牙。難得可以離開一下透下氣，我就連「箍牙」都拋諸腦後。

趁住箍牙療程(第一階段)黎到一半，我都想放自己一個假。每日咁勤力要搞排牙真係好麻煩，加上我自己又有強迫症，每日要chur爆自己要戴足22小時，其實真係幾攰。

不過呢一個星期我又唔係真係全程冇戴，而係淨係夜晚臨訓戴，每晚戴6-7小時。

 

終於可以盡情食野喇！

我發覺放自己一個小假真係幾重要。我平時成日覺得「唔可以隨時隨地食野」真係令人好鬱悶，錯過左好多美食。

其實都唔係唔可以，只係我9成時間都唔想為左食零食/小食而除牙套，食完又要搞一大輪。

所以今次去旅行真係重拾返箍牙前既美好時光：

鍾意幾時食就幾時食、食完唔駛用牙線、唔駛洗牙套，慳左好多時間。

完全就好似解放左自己咁。

 

一切都係我自把自為既決定

講明先，我事前冇詢問過醫生可唔可以咁做，我只係參考左一個朋友既做法。大家最好都係問左醫生先。

不過，我有特登延長返呢副牙套既日數。即係原本我只需戴7日，但因為我呢一個星期去旅行只係夜晚戴，所以返到香港就戴多3日full day。

 

休息都要有個譜

唔好以為我成個星期冇戴牙套好似好爽皮咁，其實都有代價架。

因為我發現當你長時間冇戴牙套，排牙真係會自己走位！呢點證明左每日戴足真係好好好重要。

我點知排牙有走位？因為我每晚一戴返副牙套既時候，好鬼酸痛！！我仲要冇帶震震機。

每晚就好似岩岩換新牙套咁痛，所以我奉勸大家如果要休息/偷懶，唔可以離開牙套太長時間。

總結呢個星期我既體會：

一旦踏入左箍牙生涯，你就永遠離不開牙套。

所以我已經做好心理準備，就算第時箍完牙，以後訓覺都要戴固定器。

 

第一階段倒數200日

唔經唔覺就箍到第30副，終於過左一半喇。(一共有58副)

都要多謝下自己咁勤力戴牙套，每日戴足22個鐘先可以加快進度。我為左「快」真係可以chur到自己好盡，全因為好想快d可以隨時食到野(好卑微既願望)。

純屬個人分享， 只供參考，隱適美療程全屬自費。