岩岩戴完第30副，又係時候做個小總結。
而家因為每星期換一個牙套，所以個進度好快，快到我就黎寫唔切喇。
上一次總結：【Nia箍牙|隱適美】Vol.16 完成20副，倒數300日！現階段效果對比圖
每次寫個總結都要用好多時間，又影相又執相又盛。有時都會諗係咪寫得太仔細？有冇人鍾意睇咁多字？
牙套對比
首先睇下第1副牙套同第30副既分別。
我發覺竟然…
冇 乜 分 別 ！
天呀，相差左咁多副竟然唔係好覺有分別？
不過細心睇既話，最明顯係上排本身生左係入面隻側門牙慢慢出緊黎、上排門牙有慢慢置中。
正面
其實我排牙有唔少進展架喇，就係冇咁亂。
排牙係冇之前歪得咁勁，另外中線開始有改善，不過仍然有好大既進步空間。
如果微開口既話會好明顯見到條中線仲係幾歪下。
唔完美，可接受，有改善空間。
拔牙缺口
曾經令我好困擾既呢4個牙窿終於有明顯收細，仲好記得一開始連開口講野都好唔自在。
而家既我冇戴牙套既時候都唔會怕醜，唔會俾人覺得冇牙好奇怪。
開始可以開心笑
仲記得初初剝左4隻小臼齒既日子，有幾個窿超級唔習慣，連講野都冇自信。
個陣我惡搞左張相。
而家開始冇咁樣衰喇，整多張新既哈哈。
Finally, I could smile.
下排東歪西倒的牙
下排呢幾隻牙一直都令我好困擾，迫到痴埋哂。其中一隻好傾斜，仲有另一隻旋轉左。
而家改善緊喇，慢慢轉返岩角度。d牙窿都細左好多。
側門牙
跟住就係我一路都好期待既側門牙，由睇動畫個陣已經好興奮。
呢隻牙終於都露左成隻出黎喇，再戴多10副左右佢就會真正歸位。而且而家都feel到隻牙冇咁頂住條脷喇。
我每次睇到呢隻牙既效果，都會諗起有一次另一個牙醫問我「係咪真係可以箍到隻牙出黎？」
我而家可以好肯定咁同佢講：
「醫生！真係得架！」
真係令人好鼓舞！
最近仲有位朋友email我，話佢既情況都係一樣，有隻牙生左係入面。佢話見到我個blog之後令到佢充滿希望，冇諗過隱適美可以處理到呢d複雜既情況。我聽完都好有滿足感，我冇諗過自己箍個牙竟然都可以為其他人帶來希望。
骨釘
有瘦?
我平時好少去磅重，岩岩我為左寫呢篇blog就去左磅一次，
係冇輕過既。
不過我箍牙呢段日子真係食少好多野。我好鍾意食零食，但係牙套面前，食零食對我而言係好煩既一件事。
有時睇返箍牙前既相，唔知係咪真係箍牙既關係，覺得以前塊面係漲d。
期待有更多的變化
雖然我仲係箍緊第一階段，仲有成28副牙套，但因為進度加快左，又見到d牙有明顯移動，而家真係見到有曙光係我面前。
睇返以前既blog都已經覺得以前係慘d。
老實講一開始箍牙既日子真係有種「睇唔到希望」既感覺，日日搞個牙套但又見唔到排牙有咩變化。好多時要真係睇到有成果先會有動力。
純屬個人分享， 只供參考，隱適美療程全屬自費。
Pingback: 【Nia箍牙|隱適美】Vol.20 戴完40副牙套 10個月效果對比 | nianiawuu