開始戴牙套已經有一個多月，感覺呢段時間發生左好多野。由熟習戴第一副牙套、經歷剝牙、正式裝attachments、正式戴牙套、學習打理牙套，到而家已經習慣左，原來成個過程都只係一個多月。
不過，就算習慣左，有時我都會突然有呢d諗法：
原來我而家真係箍緊牙。
咁多年黎都想做既野，原來我真係做緊。
有d佩服當時既我咁勇敢決定剝四隻牙，而家既我好似已經冇左呢份勇氣喇。
有時會好想時間過得快d，因為好想快d睇到變化。但又唔想咁快又大一歲，因為時間唔等人，真係矛盾。
進度
雖然話唔會咁快見到有效果，不過我係第3個牙套既時候真係睇到有少少牙齒移動既痕跡，呢個真係好大既鼓舞。
勿預期短時間會見到有分別
我好明白箍牙要好有耐性，因為唔會戴左即刻睇到效果。加上我個case一開始主要係矯正好哂後排大牙先，之後再慢慢移動前排既牙。
所以一開始其實都幾難捱，因為你要學會同牙套相處、又唔習慣又痛，同時你每日照鏡，排牙都係咁既核突樣。
個動畫只是「模擬」
自從一開始話要箍隱適美，我身邊既人都會問我同一個問題：
「你入面呢隻牙真係箍到出黎？」
初初我會話：得呀！
咁都算，就連平時睇開既牙醫都問我：真係得？
延伸閱讀：【Nia箍牙|隱適美】Vol.9「我真的不懂，Invisalign真的可以將裡面的牙弄出來 ?」
但俾人問得多之後，我都開始唔肯定係咪真係得。
因為我一直都係望住個模擬動畫，就完全相信左自己排牙會同預想既一樣，但其實都有機會跟唔上進度架喎，個動畫只係「模擬」架咋。
延伸閱讀：【Nia箍牙|隱適美】Vol.20 戴完40副牙套 10個月效果對比
不過我既然選擇左，就點都要相信隱適美係得既。
牙齒既一小步係我既一大步
當我每日好勤力做清潔、戴足21-22小時，默默付出不計較收穫既時候，我睇到有分別呀！呢個簡直係一大鼓舞。
就係戴緊第3副牙套既途中，我見到下面呢隻牙向後移左少少，有一條小罅呀！去到而家第5副既時候就再闊左少少添。
第3副牙套
第5副牙套
見到呢條罅真係好感動，雖然真係好細好細，但我諗只有箍牙既人先會明白我既感受。我問身邊既人，睇唔睇得出條牙罅呀？佢地唔覺有咩分別。
但對我黎講，呢個係一大進步。 因為本身呢兩隻牙係完全貼埋的，連牙線都好難入到，到而家可以用肉眼睇到條罅(哽咽)…
除左呢隻牙之外，其實每條牙縫都闊左。以前用牙線會好難塞入d牙縫，但而家幾乎每隻牙之間既空間都大左，證明d牙真係有移動緊。
牙齒既一小步簡直係我既一大步。我唔會睇少每一個微少既改變，因為當中包含左好多努力同堅持。
外觀
「隱形」係戴隱適美牙套既最大好處，應該唔駛多講。不過我個case黎講，我就唔可以完全做到「冇人發覺我箍牙」喇。
隱適美並唔係完全透明
戴左牙套真係唔係好覺既，不過唔可以話完全透明，因為如果細心睇就會發現牙齒表面有一層透明既野包住咁。
最明顯就係Attachment、橡筋
如果attachment係裝係門牙，就會比較明顯見到有一粒粒野係牙齒上面，不過好好彩我門牙既attachments都唔多。
但係勾左橡筋就好容易俾人發覺喇，基本上我一擘大少少個口講野就會見到兩條橡筋，有時大笑既時候都會遮住個口。不過其實又唔會太過介意，咪當係一個新既體驗囉。
不過我又好搞笑，成日係人地未發覺我箍牙既時候問人「覺唔覺得我箍緊牙呀？」，佢地大部分都話唔知，但我好似驚死人地唔知咁，成日擘大個口俾人睇。
剝牙唔可以開心笑
「箍牙都可以開心笑」呢句slogan暫時對我未適用到。有一日無無聊聊就惡搞左Invisalign某張poster。
因為剝左4隻小臼齒，有4個牙窿，變左冇戴牙套既時候就唔敢大笑。所以出去食野既時候會好冇安全感，唔係好敢同侍應講野，怕人地見到我排牙咁樣會嚇親。
痛嗎？
現階段覺得過程算舒服，講完之後希望唔好下一副牙套就好痛。
每換一副牙套幾乎無感
除左開始戴第二副牙套(即裝attachments後)唔適應，排牙酸左一日之外，我換之後個幾副牙套都冇左呢個感覺，淨係咬chewy既時候會酸，其餘時間真係「無感」到令我開始懷疑自己有冇戴錯之前個副。
我甚至好懷念、好想感受下牙齒酸軟既感覺，好似好變態。因為冇左酸軟感我就會諗係咪d牙冇移動呀？但牙套又fit 架喎！
所以唔知係咪因為每晚都咬VPro5震震機，加快左牙齒移動呢？下次問下牙醫先得。
最痛既時候係第二副牙套
諗返起個陣戴第二副牙套既唔習慣、酸軟、刮口，同而家相比就可以話係天堂與地獄。
延伸閱讀：【Nia箍牙|隱適美】Vol.7 終於裝上Attachment和拉橡筋！一個個意想不到的痛苦
個陣講到風起雲湧咁，而家既我睇返個篇文等同食緊花生。
唔知係咪習慣左，而家已經少左刮既感覺。有時一副牙套戴耐左都會有少少刮口，不過我而家已經冇咩用軟蠟，因為懶。
不過都係個句，要touch wood先，講完之後希望唔好下一副牙套就好痛。
飲食
基本上冇咩限制，但會避免食太硬既食物。至於食量，就減少左好多。
無食物限制
除左一開始剝完牙、適應戴牙套個幾日d牙比較酸所以要食粥之外，之後食既野同以前都冇分別。
不過試過食完d比較硬既食物之後，戴返牙套係特別會有緊既感覺架！即係表示咬完硬既野食之後係會令到排牙郁動，我為左避免d牙亂咁移，就盡量避免食太硬既食物。
大大減低食慾
由於每次食野都要除牙套、用牙線、刷牙(如情況許可)，所以係完全冇左食零食既意欲。飲品都已經冇咩掂過，淨係飲水。
而家既我，為左唔想咁麻煩，好多時就連早餐都會skip埋(唔好學我)，一於早午餐一齊食！奉行”All or nothing” 既精神：一係唔食，一食就食飽佢！
所以每次除左牙套之後就..係咁食…
食完朱古力一定要刷牙
我其實好鐘意食朱古力，不過開始左牙套生活之後就少食左好多。因為食朱古力之後要逼自己一定要刷牙。
平時食完野，我未必次次都會刷牙，因為有時出去食飯未必可以咁易搵到廁所慢慢刷牙。但至少一定會用牙線，再用清水漱下口就會戴返牙套。
但係一食完朱古力，我就覺得牙齒每一處都俾朱古力包圍，如果淨係用牙線就戴返牙套，我會過唔到自己個關。
因為唔刷牙既話，仲會有好多朱古力痴住d牙，我一諗起d牙會同朱古力一齊被困係牙套入面幾個鐘，就好驚蛀牙。
就係咁，我而家幾乎冇食朱古力喇。
瘦左？
呢個一定係好多人都想知既問題。
我自己覺得食少左咁多野應該會瘦左，經過一個多月之後：
磅數冇變過哈哈哈哈
過多幾個月再睇下有冇輕到。不過有親戚朋友就話我瘦左，塊面冇咁圓喎，係咪真架先唔好呃我喎。我就暫時唔係好覺。
好啦信住先啦。
清潔牙套
呢個係隱適美最最最麻煩既地方，就係要不斷做清潔。當你享受緊牙套係透明既同一時間，其實都要付出代價架。
出街食飯就特別麻煩，因為食完野往往要搞一大餐先走得。如果餐廳有乾淨既廁所，而又方便既話，我就會去刷牙；如果唔方便既，最低限度都一定要用牙線，再飲水當漱口。不過未必間間餐廳都會提供水，所以我而家出街都會隨身帶備一支水。
如果係屋企就簡單喇，食完野直接走入廁所用牙線再刷牙。刷牙期間會用清水浸住副牙套。
至於每晚既牙套清潔，可以參考【好物分享】如何清潔牙套? 隱適美清潔用品及步驟分享
每日戴咁耐真係會好污糟，唔可以懶。如果唔注意牙套既清潔，淨係擦牙既話，就等於你沖完涼之後繼續著返污糟衫一樣，前功盡廢。
剝牙傷口復原情況
現階段暫時覺得剝牙個幾日係最辛苦既，因為食粥真係好冇樂趣，又唔敢食熱野，又怕好易整到傷口流血。
隨住一個多月既時間過去，4個傷口已經癒合得七七八八，食野唔駛就住就住。希望其他牙仔快d填補呢4個空虛既牙窿啦。
新體會：自問唔係自律既人就要好好考慮下
以上就係呢1個多月既感想，雖然隱適美係好隱形，但真係係做多好多功夫，不過我都享受個過程既。如果自問唔係自律既人就要好好考慮下喇，因為未必個個人都適合戴隱適美。
唔經唔覺寫左咁多字，繼續努力，等我戴到第10副再黎對比下進度。
純屬個人分享， 只供參考，隱適美療程全屬自費。
Pingback: 【Nia箍牙|隱適美】Vol.6 難忘的拔牙經歷: 再見我的4隻小臼齒 (有圖) | nianiawuu
我想知你睇邊個醫生，我想打打骨釘
想知你邊間睇，邊位醫生
hello! 你介唔介意留個email address俾我, 或者send email俾我nianiawuu@gmail.com ,我再話你知丫:)