Blog

上半集：五分鐘就搞掂兩隻

講返今次剝4隻小臼齒，我抱住一個好平靜嘅心情去左剝兩隻先。

入到去，醫生同我確認一次要剝邊4隻牙，問我想剝左邊定右邊先，我揀左邊，求其揀。

好快地，醫生就開始打麻醉藥，左邊2隻小臼齒既內外側都會打，即係打左4下。打完之後就漱口，呢個時候我已經感覺到個嘴唇麻痺左。

又好快地，醫生話幫我測試下麻醉藥生效未，話口未完就開始幫我剝喇！過程只係感覺到醫生好用力咁搖，我個頭都係咁搖。

然後聽到d骨頭嘅「滋滋」聲，醫生就話剝左喇。佢用力抆嘅過程係唔痛既，只係個頭不停被醫生搖來搖去。

之後咬左1個鐘紗布就止左血，退左麻醉藥又冇痛。對於呢次剝牙經歷好滿意，好順利！不過就好唔習慣有兩個牙窿。

 

可怕的拔牙下半集

4日之後，當我仲習慣緊兩個牙窿嘅時候，又要迎接右邊多兩個牙窿。

不過經過左上次咁順利嘅經驗，我都好平靜咁去面對呢次剝牙。

醫生都係一樣好快地同我講要剝邊兩隻牙、打麻醉藥。然後好快就剝好右下隻小臼齒。

然後就到右上，見到醫生又係好快剝左出黎，一心以為搞掂左啦。但醫生呢個時候竟然較低張治療椅：

「仲有少少要處理下。」

咁我以為會好快處理完。點知！！處理左成半個鐘！

醫生起初都會同我報告下狀況：

「因為隻牙腳斷左，要清理返先。忍耐多一陣。」

之後！醫生就冇講過野喇！！！！！！！

淨係見到佢好努力，不停換左好多工具，仲要有鑽！天啊！

呢半個鐘入面我演左好多場內心戲。

點解要鑽？鑽緊d咩？
醫生抺哂汗喎，係咪搞唔掂呀？
咁耐既？係咪整唔到呀？隻牙腳係咪永遠都係入面架喇？
仲有牙係入面，咁我係咪箍唔到牙喇？
之後係咪要開刀拎返出黎呀？
醫生不如講兩句丫？
(助理不停隊入去個傷口度吸d血)隊到咁入，我個傷口咪有排先好返？
我會唔會失血過多，然後暴斃係呢度？
我當初係咪唔應該箍牙？

呢半個鐘好驚，因為我唔知發生咩事。醫生已經唔講野，睇落又好束手無策，所以我就將所有野都諗到好壞。

然後診室入面仲播緊好悲傷既歌，咁煽情…我就黎要流眼淚。

「好，已經搞掂左喇。因為隻牙腳斷左係入面，所以要整佢出黎。Check過入面已經清理好喇。」

醫生終於開金口喇！等左好耐呀，好驚呀我，俾隻牙腳玩死喇！

返到屋企，個傷口果然流左好耐血，幾個鐘都未止，換左好多次紗布，我又開始好驚喇…係咪要返診所呀？不過返去都係叫我咬紗布架咋喎。

好彩去到第4個鐘終於都止左。呢日身心都好攰。

 

「我會乖乖戴好牙套，報答你地嘅犧牲！」

搵左個盒仔裝住呢4隻陪左我咁耐嘅牙，有時會掙扎：

剝左4隻健康既牙係咪好傻？

雖然係有d可惜，但係個口唔夠大，再多既牙都只會變得多餘。就等於呢度只得24張櫈，根本坐唔到28個人嘅道理一樣。

所以，我同自己講要努力戴好牙套，希望呢幾隻牙嘅犧牲係值得既！

延伸閱讀：【Nia箍牙|隱適美】Vol.10 隱適美1個多月進度+感想：第3副已經看到一點點改變! 有瘦?!