Blog

上次講到睇完動畫，我一心以為confirm左之後就會開始進入牙套製作既stage，加上個陣姑娘都係咁同我講。

但係早幾日診所打俾我，話顧問醫生想同我傾下，先知原來牙套係未開始整既。

好喇，呢日去到診所，好不幸撞正左診所既咨詢日，所以好多人。最後等左個幾鐘先見得醫生，禁電話禁到好悶。

「呢個Plan就快好多，不過效果就冇咁好喇」

原來今次黎係睇另一個plan既動畫，即係只剝兩隻牙，中線唔會改善到。不過時間就會快好多。

兩個方案詳情可參考：【Nia箍牙|隱適美】Vol.2 終於決定做隱適美(咨詢過程+價錢)

不過我就真係唔會考慮呢個Plan喇。因為我十分唔滿意個效果，上排牙箍完都係歪一邊。顧問醫生都唔建議我揀呢個，不過就俾我睇下參考下。

兩個plan價錢只差三千蚊，要揀緊係揀個最好既選擇。

雖然我上次已經決定左揀plan 1，一開始都唔明點解又要我返黎睇另一個plan。但諗諗下其實都好既，至少可以睇到另一個Plan出黎既效果會係點。

有對比之下，等我更加覺得自己冇揀錯丫嘛。

原來拎左牙套先再剝牙

同醫生傾完之後就同姑娘約左4月尾返黎拎牙套喇，到時會教我點除/戴同護理方法，好興奮！終於都開始整我既牙套喇。

「唔係剝左牙先戴牙套架咩？」

姑娘話拎左牙套先再約時間剝牙喎。

係喎，我睇返個動畫，第一副牙套係未剝牙架！即係4月就開始我既牙套生活喇！

後記

醫生之後改左少少個療程，第一階段由41副增加到58副。 第二副開始就要同attachments 同橡筋共處。

同上一個動畫既分別係，新version冇磨牙，但側面睇既話d 牙收得唔夠入；另外就係中線未夠齊。

我問過姑娘，話會係下一個階段先慢慢改善返。

純屬個人分享， 只供參考，隱適美療程全屬自費。