Blog

期待左好耐，終於可以睇到模擬動畫喇！原本兩個星期就可以返診所睇，不過因為中間隔左個農曆新年，所以等多左一個星期。上次姑娘話：

「兩個星期有片架喇，如果我地收到既話都可以send左俾你睇先。」

就係因為呢句說話，我每日都Check 住email，每日都好期待會收到動畫。

結果，隔左3個星期都冇收到，真係好折磨。我亦都開始感受到隱適美漫長既前期準備：就係等。

 

令我震驚的畫面

去到診所，姑娘好快就叫我入去睇動畫喇！呢一刻其實我內心真係好澎湃，但係要壓抑住！

姑娘叫我坐係電腦前面，我下一秒見到既畫面就係咁：

天呀！排牙咁樣成何體統？

上排既牙原來歪得咁過份，平時係唔覺架！下排就唔駛多講。其實睇到呢一幕我好震驚，望住呢個畫面有種熟悉又陌生既感覺。

 

終於肯定自己做岩左決定

我發覺當冇左其他野分散注意力，淨係專注睇排牙既時候，原來牙齒混亂情況係比想像中嚴重，重點係到呢一刻先真正肯定自己做岩左決定（感動）。

然後姑娘開始Play段片一邊講解，我內心仍然好澎湃好興奮，成個人被條片吸住左。

忍唔住問佢我可唔可以要條片，姑娘話之後可以send俾我。

 

第一階段療程

• 剝4隻小臼齒 (上下左右各一隻)
• 裝Attachments
• 上兩隻骨釘
• 58副牙套

延伸閱讀：【Nia箍牙|隱適美】Vol.2 終於決定做隱適美(咨詢過程+價錢)

 

模擬動畫去片

正面

開頭灰色個4隻牙就係要剝既小臼齒，目的係製造多D 空間俾其他牙排返整齊。

上排牙齒

見到隻側門牙慢慢出返黎真係好感動，同時又覺得好神奇 ！ 好似打開左道門俾佢出黎咁。

黎多個Close up，呢一幕真係會睇唔厭。

下排牙齒

下排除左門牙亂之外，睇完呢條片先發現原來後面d大牙(大臼齒)都好歪。

側面

另一個驚喜！我發覺由側面睇會好明顯見到d門牙向後移左唔少，睇動畫個前後差距大約有4.5mm。

我本身冇哨牙，但好想知道到時個臉型係咪會變得立體左呢哈哈哈。

 

睇左個動畫不下五十次

個動畫真係好好睇，好治癒。因為終於見到自己排牙係整齊既，並唔係幻想。一路睇就一路期待快d 去剝牙、戴牙套、上骨釘….哈哈！

睇完動畫之後，我就叫姑娘俾條片我。

原來並唔係真係send一個video file過黎，姑娘係會經Invisalign send個invitation link同password俾我，我login入Invisalign 個system就會睇到個動畫。

我覺得好好玩，因為可以任意拉去唔同角度咁睇。到而家應該睇左不下五十次，著左迷。

 

模擬動畫到底有幾準確?

我成日好好奇點解而家科技可以咁進步，掃瞄下就可以得出成排牙齒既立體影像。

然後我屎忽痕做左個對比，又真係幾準喎。

 

模擬動畫點樣睇？

Attachment：
即係牙齒上面一粒粒既白色點。作用就係增加牙套推動牙齒既力量 ，就好似安裝係牙齒上既把手。
我數過我要裝18粒，咁多粒，到時如果唔小心甩左都唔覺…

延伸閱讀：【Nia箍牙|隱適美】Vol.8 才剛開始就掉了3粒Attachments!

鄰接面去釉處理 IPR（Interproximal Reduction）:
畫面上方有幾個菱形寫住”.3″，其實係指修磨牙齒。牙醫會係我以下5個牙縫磨0.3mm既空間。
以我所知，磨牙除左製造空間外，仲可以改善牙齒形狀以防止出現黑三角。

延伸閱讀：【Nia箍牙|隱適美】Vol.4 Re-confirm 療程，更新模擬動畫

 

治療前後的疊影:
藍色就係牙齒原本既位置，主要都係顯示治療前後牙齒移動左幾多。
真係好多！！

 

下一步：拎牙套

今次覆診confirm左療程之後，美國個邊就會開始製作我既牙套喇。姑娘話大約要等1.5-2個月，牙套到左之後，就約時間剝牙喇！

咁下次update應該係講拎牙套喇！YOHOOO

 

純屬個人分享， 只供參考，隱適美療程全屬自費。