Blog

「點解你要箍牙呀? 你唔駛箍啦」

你地唔會明架喇，只有自己先最清楚自己排牙係點。平時同人講野既時候對方好難發現我排牙既問題，佢地甚至會話我排牙好齊，但上排牙齊得黎其實係歪左去一邊；而佢地如果細心留意下排既牙，應該唔會講得出「你排牙好齊」呢句說話。

 

箍牙？矯正？別搞我

細個一直都唔介意排牙亂，應該係話冇意識到自己排牙有問題。

但人愈大就開始慢慢注重牙齒健康，發覺愈睇愈唔順眼。 細個嗰陣屋企人有叫過我去箍牙，我好記得當時聽完呢個建議之後跑左入房撲倒在床上喊。

「 箍牙？好痛架喎，好驚睇牙醫喎，排牙有鋼線喎，唔好逼我啦，我唔要..」

 

箍牙一直是我多年來想做的事

雖然我以前對箍牙咁抗拒，但其實我一直將呢件事放係內心深深深處。排牙亂，唔多唔少會影響自信，咁多年黎我一直都唔夠膽笑得太開。

直至出黎做左幾年野，開始有少少能力，慢慢重新考慮呢件事。黎到2019年，終於都決定要了左呢件心事！

 

我的牙齒狀況

首先講下我d牙既情況，主要係缺乏充足空間生長，變得好擠迫，外觀唔好睇之餘清潔起黎又唔方便，平時用牙線都好難攝入d牙罅。

上排問題：

1. 品字牙
我隻左邊側門牙由於冇位生，零零舍舍生左係成排牙既後面。其他人如果係水平或高炒咁望我，其實係睇唔出有隻牙係後面；但如果我顎高頭，佢地就會覺得好有趣：「點解會多左隻牙既？」

但我要為佢辯護，其實佢並唔係多左，而係俾其他牙排擠，長期被遺忘左係後面。就好似玩爭櫈仔，爭輸左仲一直企係度。 （好可憐）

咁多年黎屋企人都會叫我剝左呢隻牙去，話佢喺度都冇用，又頂住條脷；甚至有一次我去洗牙，連牙醫都叫我剝左去（天啊！連牙醫都判你死刑）。

「呢隻牙其實係後面都已經冇作用，反而咁樣會令你好難清潔。中間會藏好多細菌，容易造成牙周病，你可以考慮下。」

我都好明白，因為呢個位真係好易攝食物，隔幾日冇用牙線都好易流血，有時仲無啦啦自己流血。

不過，因為我心裡面一直想d牙有一日可以整齊，覺得如果有一日真係箍牙，呢隻牙話唔定會有用！本住「養兵千日，用在一時」既心態，我都係決定留住佢，唯有平時俾心機d清潔啦。

延伸閱讀：【Nia箍牙|隱適美】Vol.9「我真的不懂，Invisalign真的可以將裡面的牙弄出來 ?」

 

2. 中線歪
因為左邊隻側門牙被排擠左去後面，所以好容易就想像到條中線歪一邊。
上排既牙係向左偏離好多，亦導致兩隻正門牙有高低既情況出現。

唔畫條線都唔知排牙歪到咁，我自己都嚇一跳。 上排牙好陰濕，歪得黎又睇落好整齊，有時自己都會俾佢地呃到 。所以大家覺得好齊，其實都可以理解。

 

下排問題：

1.門牙傾斜、推擠
同樣因為空間不足，一隻側門牙傾斜左；有隻犬齒旋轉左接近90度，一直用個側面黎見人。而其他正、側門牙都生得唔整齊，有高有低，有前有後。

延伸閱讀：【Nia箍牙|隱適美】Vol.22 第一階段完成(1年2個月)！覆診+牙齒掃瞄

 

講這麼多反正就是亂　希望有一日可以撥亂反正

排牙亂，一黎容易有牙周病，二黎唔好睇。

所以我開始上網Search有關箍牙既資訊，驚覺原來有隱形牙套呢樣野，實在太後知後覺！（不過就算一早知都冇錢做）知道佢透明真係幾吸引，唔易俾人發覺，又可以拆落黎清潔，所以就收窄左範圍，主要睇隱適美Invisalign既資料。

我發覺當你一開始睇，就會停唔到架喇！！愈睇愈想箍！雖然知道好貴，但覺得而家唔做就以後都唔駛做。

就係咁keep住團火，我就book左一間牙醫診所做咨詢。

 

 

一係就唔做，一係就要做到最好

開呢個Blog主要想紀錄低呢個歷程，始終箍牙對我黎講係一個重要既決定。

成世人流流長，我好想記低黎緊呢幾年既變化同感受，等第時可以慢慢回味，知道原來以前d牙原來係咁既樣，同時亦都想藉此同大家分享下交流下。

作為完美主義者，一係就唔做，一係就要做到最好。你見我整個Blog都整色整水咁，都係純粹滿足下自己，打Blog都打得開心d。

 

後記：你地都可以記錄低你地既經歷

有時收到有朋友仔既email/留言，話個blog好好睇叫我快d update(有咁好睇?)、令到佢地更加有動力去行動，更有朋友話我不知不覺地勉勵左一d初初開始戴牙套既人。

其實我每次聽到都覺得好有滿足感。因為一開始只係自己想記低自己箍牙既各種點滴，等自己日後可以睇返，所以從來冇諗過自己可以幫到人。

我都好鼓勵大家用唔同方法記錄低你地箍牙既經歷，為自己留個紀念都好丫。有時睇返以前既相，我都會心諗「好彩有去箍牙」。