Blog

呢排香港發生嘅事，實在令我做咩都冇心機。每日不停update新聞，睇到好攰但係又忍唔住不停refresh，一路睇一路好擔心，個人好似就黎抑鬱咁。

講返箍牙進度，而家已經戴左兩個幾月，目前戴緊第9副牙套，每日戴22小時或以上，每副牙套戴8日。

 

好痛呀醫生

早幾日去左覆診，一如以往又要等起碼半個鐘先到我。

入到去，醫生就幫我除副牙套出黎，不過醫生係用工具撬出黎。不過你知醫生對你排牙點都唔會比自己熟悉，佢係唔會知點樣就住除嘅，所以我排牙就好似俾佢扯咁，好痛！

仿佛回到剛剛開始適應戴牙套既日子咁，俾佢除牙套個下真係好鬼痛！

我忍唔住出聲。

「醫生，不如等我黎啦」

因為只有自己先最清楚點樣除先係最快最唔痛，不過醫生都冇理到我，佢話佢ok。

除完之後醫生就幫我check下d attachments仲齊唔齊，望下牙齒既狀況。之後再幫我戴返牙套。

成個檢查就完。

 

咁難得見醫生，點都要諗定幾條問題問下！

諗返起第一次黎做咨詢嘅時候好倉促，事後我好後悔冇捉住顧問醫生問多d問題。

不過今次我唔會就咁就放棄。我準備左幾條問題要問呢位醫生，雖然佢唔係我既顧問醫生（幫我設計療程個位），但一於有殺錯冇放過。

 

「醫生，點解箍完第一階段之後我排門牙反而哨左？」

呢個問題困擾左我成兩個月，因為當初我睇第一次既動畫並唔係咁樣。

點解門牙本來唔哨，但箍完變哨牙？

其實當初我發現原來顧問醫生改良過個療程而我又未被知會嘅時候，我第一時間打電話返診所，話我想見醫生。

個姑娘就答我：

「可能醫生唔想進度太快，所以之後會慢慢幫你調整返架喇。」

我對於佢話「可能」都幾不滿，你答得咁唔肯定咁係咪更加要安排我見醫生呢？

不過我個陣又冇諗咁多，覺得要相信醫生嘅判斷，就等兩個月後黎覆診先問啦。

好啦終於等到呢日返黎覆診，咁我就即刻問醫生點解會咁，雖然佢唔係顧問醫生。

「d牙本身係要有斜度，唔會完全直架。有少少斜先係正常。」

真係嘅？？但係好樣衰喎！

冇用嘅我當時又俾醫生說服左。不過…

當我而家睇返上面張對比圖，我又覺得好難睇…問題係：本身我冇哨牙，點解我會無啦啦變哨牙…

我一邊打呢篇文一邊又好擔心，就停手即刻打多次電話返診所…（究竟我仲要俾哨牙呢件事纏擾幾耐..）

今次呢個姑娘就話：

「其實都好多patient同我地反映過呢個問題，佢地都係睇到模擬效果發覺d牙哨左。
不過唔駛擔心，而家只係第一階段，你有四個階段。
你戴完第一階段之後，如果有需要既話，醫生會幫你磨牙，騰空少少空間俾啲門牙收返入去。」

雖然佢講既野同第一個姑娘係一樣嘅，但當我聽到「好多patient同我地反映過呢個問題」之後就安心左唔少。

我而家唯一既希望就係可以快d捱過哨牙嗰段日子。

延伸閱讀：【Nia箍牙|隱適美】Vol.22 第一階段完成(1年2個月)！覆診+牙齒掃瞄

 

「醫生，我一日戴夠22小時，可唔可以7日就換一副牙套呀 ?」

我承認我係有d心急，所以每日都逼自己戴22個鐘，希望下次覆診可以再加快進度。

「其實理論上可以嘅。
不過因為你有剝牙，唔建議換得太密，怕牙齒會跟唔上進度。現階段照樣每副戴8日先，到後期少少就可以7日換一副。」

聽完又覺得真係唔可以太心急，始終剝完牙之後有四個大窿，要填補呢d窿唔係一時三刻可以做到，我嘅諗法實在太危險喇！（掌嘴）

所以心急都係冇用，唯有乖乖地戴好每一副，唔係真係會弄巧反拙。

延伸閱讀：【好物分享】隱形牙套用家必備: 實用免費app TrayMinder Aligner Tracker – 牙套貼心小幫手

 

其實而家8日換一副都算密，比起當初戴14日、10日已經快好多。

下面個table係醫生建議既配戴日數。

按照呢個表，我每日戴22個鐘既話其實7日就可以換新既牙套。不過醫生話都係穩陣d，照戴8日先。

最右手邊個column係講緊個部VPro 5震震機，不過其實我每晚都有用。

延伸閱讀：【好物分享】VPro5震震機用後感

 

「醫生，其實一日要換幾多次橡筋架？」

由於一開始佢地冇話我知一日要換幾多次橡筋，所以我都係參考網上啲人嘅做法：

朝早訓醒換一次；
午餐後換一次；
晚餐後換一次。

由於我左右邊都要拉橡筋，所以一日會用六條橡筋。搞到啲橡筋消耗得好快，我一個月就用完一包，所以上個月我就要特登返診所拎。

咁我今次就好奇問下醫生應該要換幾多次。

「其實你可以一日換一次橡筋。」

WHAT????竟然係咁？等我仲換得咁勤力！

「但係醫生，d橡筋好快就冇彈力喇喎。」

「哦～其實你都可以勤力d換嘅，可以食完午餐後換一次。你問姑娘拎多d橡筋都冇壞嘅。」

 

邁向第十副

下一副就係第十副牙套喇，已經明顯睇得出有改變。下次就寫個成果對比先！