由六月到而家八月尾，每日幾乎都俾政府挑戰香港人既底線。雖然發生咁多事，多到覺得時間過得好快，快到原來每日好專注咁吸收四方八面既資訊既同時，唔知道眨下眼原來就到左8月尾。
好多人都因為呢次事件，發覺自己真係好愛呢個地方，包括我自己。
又不知不覺間，曾經我每日都好緊張既箍牙情況，都變得微不足道。
一齊見證住我排牙既轉變
望返轉頭，原來已經箍左牙4個月。
最近開始有人會send email問問題，多謝你地會同我講呢個blog真係幫到你地，我亦會繼續寫落去，等大家可以見證住我有朝一日既靚牙，我自己都好期待。
終於都完成左第一盒喇！
仲好記得一開始去拎牙套既時候，俾個數量嚇親。有四個盒，裝左成58副牙套。
延伸閱讀：【Nia箍牙|隱適美】Vol.5 隱適美牙套開箱！(附加注意事項)
雖然姑娘話可以keep住之前個5副牙套，但我選擇每一副都keep (始終係錢黎架嘛)，因為我覺得有紀念價值，唔捨得掉左佢。
所以我每戴完一副，都會刷乾淨個牙套，再用清潔片Retainer Brite浸佢成晚(呢個只係我自己既做法)，第二朝先拎出黎風乾。每次浸完之後都冇哂味，可以放心放返入袋好好保存。
戴完第一盒，緊係要倒哂出黎影返張相先啦。
睇得出用過既牙套係黃黃地，自問自己好認真打理牙套，絕對唔會戴住黎食野。證明左牙套會變黃真係在所難免既。
第一次整爛牙套
因為戴慣左牙套，而家除牙套都好熟手，熟手到有時貪快會大力左，唔小心整爛埋個牙套。
就係我而家戴緊呢副，第4日就發覺佢裂開左，好彩唔算裂得好嚴重咋。
不過呢個係好好既經驗，提醒自己唔好一時貪快用錯力去除牙套，就算習慣左都好，都要就住黎除。
好懷念以前可以隨時食野既日子
因為戴牙套要食野實在太麻煩，太多功夫要處理，所以我而家已經冇食零食。就算食，我都會連埋正餐一齊食，滿足下自己既欲望。
有時行行下街，想食杯雪糕都會俾「戴牙套」呢個原因狠狠地拒絕，所以有時真係好想快d箍完牙，快d回復可以隨時食野既日子。
純屬個人分享， 只供參考，隱適美療程全屬自費。
