Blog

上兩篇先講左岩岩裝完Attachments，冇諗過咁快又有野寫喇。我覺得上次幫我裝Attachments既姑娘(牙齒衛生員)有d求其，唔幫我磨走d 多餘既位，影響我既咬合同牙套既貼服度。

延伸閱讀：【Nia箍牙|隱適美】Vol.7 終於裝上Attachment和拉橡筋！一個個意想不到的痛苦

 

奇形怪狀的Attachments

首先想講下我覺得我d Attachments好獨特。上次個姑娘好「慷慨」，幫我裝Attachments既時候擠左好多物料(樹脂)落個template度，所以套個template落去我d牙既時候d 樹脂就滿瀉左出黎。

因此，我既attachments唔止係一粒粒咁，而係佢地每一粒都有好厚實既底座…有d牙係俾attachment cover左一大部分面積，就好似下面呢隻咁。

我真係覺得d attachments咁大撻好礙眼，不過礙眼都已經係其次，整到咁厚令到我副牙套唔夠貼服。

 

更加咬唔到野

上次有講過，咬合既時候上排牙會頂住下排既attachments，令到上下大臼齒冇辦法完全咬得埋，搞到我唔可以將食物咬到好碎。

呢個都算，因為真係無可避免既。

但係，多餘既位置會更加阻礙我既咬合。其實磨走d多餘既位就可以令我咬得好d，但係上次個姑娘冇幫我磨。

我既大臼齒既attachments就好似咁，唧哂出黎，仲超岀左隻牙既長度。如果當日我即場睇到一定會要個姑娘幫我磨走去，奈何我到夜晚食飯既時候先發現。

天啊點解我咬唔到野架！點解d attachments出哂界架？！

真係晴天霹靂，頓時冇哂食野既樂趣。仲好記得當晚我搵左指甲挫嘗試磨走呢d位，但根本磨唔到。

 

Attachment 封住我條牙罅呀！

而家我戴到第3副牙套，有一日食完野用牙線既時候整甩左一粒。

甩呢一粒我覺得唔出奇，因為呢粒Attachment 係封住我條牙罅架！

而呢隻大臼齒既Attachment又好貼近前一隻牙，所以條牙罅就被封印左。我夾硬先塞到條牙線入去條牙罅，果然咁樣好快就俾我整甩左。

 

咩話？上排又冇左兩粒既？

發現整甩左一粒之後我就順便就檢查下其他attachments仲健唔健在。望住副牙套對照返，乜點解左上角d大牙咁平滑既？

原來又冇左兩粒喎！

但我完全唔知幾時甩，都幾大機會吞左落肚，唔知會唔會自然排出體外呢哈哈。

之前問過診所如果甩attachment點做，佢地話甩少過3粒都冇咩大問題，下次覆診返去加返就得。即係如果甩一兩粒，佢地唔會點理。

咁我係咪應該慶幸我甩左3粒呀？

 

裝回3粒attachments

我跟住就同診所講我甩左3粒attachments。姑娘即刻幫我約左個時間返去加返，如果甩左1,2粒既話就要等多1.5月去覆診先可以加返。

今次遇到既牙齒衛生員就再唔係上次個位喇，呢位親切得多，又好耐心聽我既苦況。

佢首先幫我加返3粒attachments，加完之後仲好細心幫我試下用牙線check下有冇多餘既物料痴左係條牙罅度。

 

如願以償：磨走attachment旁邊多餘的物料

呢位牙齒衛生員見到其他attachments既盛況就話：

之前又真係落得重手d既，咁樣會令你咬唔到野，食唔到野呀。 我幫你磨走去啦。

真係感動，終於遇到一個好nice既衛生員，終於都係呢個診所感受到人間有愛。

然後就幫我磨走attachments旁邊多餘既位，我唔知佢用咩工具，但磨既時候唔痛既，d聲音就好刺耳。

磨完之後真係咬得好左，雖然唔係完全咬合到，但已經好左。

最後我忍唔住同呢位牙齒衛生員講：

唔該哂你呀，你好好呀，上次個個人都唔理我既。

佢聽完之後都笑左，希望下次都可以遇返呢個姑娘啦。

 

純屬個人分享， 只供參考，隱適美療程全屬自費。