Blog

一分鐘就check完

由於牙醫既schedule太密，每次覆診都好快就見完醫生。

今次都唔例外，醫生幫我除左副牙套出黎望左一陣之後，就幫我戴返，過程約一分鐘。

成個過程我好想問問題，但醫生不停咁講野，好似好趕時間咁。

「幫你check過喇，attachments冇甩，骨釘都冇咩特別。你照平時咁戴牙套、勾橡筋、做清潔就可以喇。咁你約返下次返黎覆診既時間啦，記得問姑娘拎橡筋。」

成個氣氛就好似要送我走咁，真係凳都未坐暖。

但我一句說話都冇講過呀醫生。

 

覆診前諗好哂要問既問題

汲取之前既經驗，我覆診前都要draft定想問既問題，確保自己記得要問醫生。

其實一路箍牙一路都會有新既問題想問， 加上每兩個月先會覆診一次，所以真係要好好把握見醫生既機會，唔可以咁快就走人。

 

好消息：加快進度

話說之前都有提過，根據醫生建議，如果每日戴足22小時就可以每7日換一副牙套，但都要視乎情況。

我六月覆診時有問過醫生可唔可以7日就換。佢當時叫我過多一排先，因為剝牙case比較複雜，照樣每副戴8日先，到後期少少就可以7日換一副。

今次我當然好煩咁再問多次呢個問題。

醫生今次話：

「可以呀！你每日戴足22小時，而家配合埋骨釘，可以7日換一副喇。」

太好喇，終於都可以加快進度喇！不枉我每日咁努力搞排牙，終於都可以加快少少。

我之後就即刻係個app度調整返每副既日數。雖然要逐個禁，禁廿幾次但係我禁得好開心，因為又可以縮短箍牙個時間喇！

【好物分享】隱形牙套用家必備: 實用免費app TrayMinder Aligner Tracker – 牙套貼心小幫手

 

壞消息：一隻大臼齒跟唔上進度

興奮既感覺好快就俾另一個消息打沉左。

事緣我時不時都會開個模擬動畫黎睇，最近開始留意到一隻大臼齒好似唔係幾聽話。

我下排左邊既大臼齒，本身係歪左既。按模擬動畫既進度既話，去到第24副suppose應該已經轉返正，如下圖。

但係好可惜，我發現呢隻牙好似冇移動過咁，到而家仍然係好歪。總之就係同動畫唔一樣。

咁我當然要捉住醫生問啦。我諗醫生檢查得咁快都應該留意唔到架喇。

醫生答：

「係正常既，呢隻牙既位置係難郁既。一開始設計療程既時候其實都將呢隻牙界定為困難既郁動，所以佢未必會移得到既。」

醫生好平淡咁講，一副理所當然既模樣。而我就黑人問號。

點解冇人同我講過呢個問題架？

不過我之後諗返，我估係因為後面隻智慧齒頂住，所以牙套冇辦法包哂成隻牙，所以好難向隻牙拖力？(純吹水，冇根據既。)

不過呢個係一個好好既例子，證明模擬動畫只可以用作參考，未必乎合實際情況。

 

咬合問題幾時先會改善到？

好快咁就黎到第三條問題，頓時覺得自己好似記者上身咁。

「醫生我想問多個問題。我而家咬合好困難，合埋口d牙係咬唔實既。成排牙只得上下兩隻門牙有接觸點，平時食野都唔係幾咬到。」

醫生又好平靜地話：

「都係好正常既，呢個問題要箍完牙先會改善到。」

Ok…咁唯有忍耐下啦。

 

去旅行點箍牙？

話說我黎緊會去個旅行放鬆下自己，因為感覺自己情緒好似到左臨界點。不過去旅行究竟點打理牙套呢？

我都唔知架，下個blog就上黎分享下啦。