如題所述，到最後我竟然要展開第4階段嘅矯正療程。仲記得當初做consultation 時，診所話最多會包4階段療程(4 set牙套)，我嗰陣諗我應該玩3個階段就會完喇掛？點知到左今日，我已經展開咗第4階段。諗返啱啱開始戴牙套真係好唔習慣好辛苦，嗰陣嘅自己如果知道4年後仲戴緊牙套應該會好崩潰喇哈哈。
繼續微調咬合問題
上一篇blog有提過，我主要係爭咬合未得。我曾經有諗過：
「不如唔好追求完美，側側膊同醫生講自己已經好滿意個效果，叫醫生close我file，完成個Treatment算吧啦，好攰了。」
但我又過唔到自己嗰關，又同自己講：
「兩邊臼齒都咬唔埋，點可以草草了事呢？反正都洗濕咗個頭，唔爭在再整好啲丫。」
不過就算我真係過到自己嗰關，醫生都未必真係會放過我。無謂ff咁多，不如面對現實。
矯齒接近4年 連醫生也將離港
我都好想藉住呢個blog了解下有冇同路人都係箍咗/將會箍四年或以上呢？如果真係有嘅不妨留言話我知丫，等我知道自己唔孤單，我哋可以互相打吓氣。
另外好搞笑嘅係，我竟然箍到連跟開我嘅牙醫都就快離開香港，所以真係想知自己算唔算箍得好耐。
之後會有另一位牙醫幫我跟進，不過只要自己一直乖乖戴好牙套就應該唔會有大問題。
Nia’s 第四階段療程 (進行中)
共有牙套
Attachments
由於之前我一直都可以每日戴到22小時，所以每7日就可以換一副牙套。不過今次醫生話今個療程有郁到啲牙根，所以想保守少少，拉長返個間隔：每10日換牙套。
換言之，我要多270日先可以箍哂手頭上嘅牙套。
最後階段的模擬動畫
每次開始新一輛嘅療程嘅時候最重要嘅係要問診所拎呢個模擬動畫，可以俾自己預視下嚟緊啲牙會點郁、完成後個效果會係點、仲可以知道邊啲位置將會好酸軟haha。
雖然睇個動畫好似唔係好睇得出有咩改變，不過唔好睇少每一次嘅小郁動，因為就算到咗微調階段，每戴一副新牙套嘅頭兩日都仍然會有酸軟嘅感覺。
淨係睇下面個動畫比較明顯嘅係見到條中線由一開始唔對，到最後會對返齊。另外就係調整臼齒嘅咬合。
不過當然，呢個只係模擬嘅效果，到最後都有可能有偏差。
順便都俾大家睇吓我每一個階段嘅改變。每當我見到之前嘅動畫都驚覺原來自己已經行咗好長嘅一段路。有興趣嘅可以追吓之前嘅blog，箍牙前嘅牙齒情況係非常亂。
減肥會有平台期，箍牙都會，不過係心態上。早排覺得「見唔到箍完嘅一日」時，但望返之前嘅亂牙就可以提醒自己：頂多陣呀，你已經行咗一大半喇。
看不厭的側門牙重光動畫
每次講起模擬動畫，都不得不再重溫吓我隻側門牙。
冇睇過我個blog嘅朋友仔可以睇下我箍牙嘅第一篇blog，其實我箍牙嘅其中一個原因就係為咗呢隻一直生咗喺後排嘅牙仔。以前一直都好想排牙整齊，唔敢大笑，覺得總會有一日會箍返呢隻牙出嚟。而家都會多謝當初嘅自己真係有去行動。
諗返我喺做consultation嘅時候，醫生俾咗兩個plan我揀，其中一個plan係要剝呢隻牙，雖然平啲但效果唔會係最好。最後我都慶幸自己揀咗另一個「唔使剝呢隻牙而又有較佳效果」嘅plan。
你可能會諗，隻牙喺後面係咪真係可以唔用傳統鋼箍而箍到出嚟呢？呢個問題我都有收到過有朋友仔問過、更曾經被另一個牙醫質疑過。
事實證明咗原來真係得㗎，見到以下嘅轉變真係好治癒又感動。
不過最後呢隻牙嘅兩邊都出現咗黑三角(傷心)。
整理呢堆相嘅時候好佩服自己以前每星期都影一輯相紀錄低，仲要係好多唔同角度。第1、2階段嘅相真係冇影漏過，因為改變實在太大，想記低去；到咗第3、4階段真係冇咁有心機影(懶咗加上每副牙套嘅變動相對細啲)。
我仲將呢4年嘅轉變剪輯成一條片，希望可以俾到勇氣大家！
我選擇了「先苦後甜」
下次覆診就會係3個月後。有時會好想快啲箍完，好想出街隨時可以食嘢，唔好次次都好掃興咁話：我箍緊牙唔食得。
呢幾年要戴口罩，唔可以隨時食嘢都話好啲；但初初未有口罩生活嘅日子，真係會覺得冇得隨時食嘢係好冇癮嘅。
當然我知有啲人為咗輕鬆啲，每日會戴較少鐘數，換來較輕鬆嘅牙套生活，不過呢種及時行樂嘅代價就係需要更長嘅時間完成療程；而我就係屬於先苦後甜嗰類人，我會選擇犧牲而家嘅快活而更快得到「自由」，即係chur爆自己一日戴至少22小時，將整個療程時間縮短。
每個人都有佢哋嘅選擇，冇話邊種好啲嘅。
我亦都冇因為呢種chur爆自己嘅生活而感到好辛苦，因為我已經習慣咗；亦唔會去埋怨，因為係自己揀嘅。
有時覺得好攰，咪安慰自己下，箍得愈耐拉返勻咪愈抵囉。
下次再講吖！
純屬個人分享， 只供參考，隱適美療程全屬自費。
剛比完錢準備開始箍牙…內心超級怕
雖然本身牙既排列唔算太嚴重，甚至如果用另一個方法成功的話可以唔洗拔牙
但自已本身牙超爛，幾乎上排所有牙+下排所有大牙都有補過，仲要有上排前排既兩隻杜左牙根所以套左假牙
有啲怕箍到一半啲牙會出事
將你既經歷當小說咁睇，睇完覺得安心左少少，起碼知道大概會發生咩事，又有咩要注意/有幫助既
恭喜你呀Neko，成功踏出左第一步👍🏻
之後嘅嘢擔心唔到咁多，唯有做好自己本分先，努力戴好牙套，有問題就交俾牙醫解決🙌🏻🙌🏻加油呀
hello 你好 ，第二次喺呢度留言
第一次係我啱啱帶第一副牙套冇幾耐嘅時候，係三年前😂
而家第二次係我完咗整個療程，今日第一日戴固定器。
當初箍牙前見到你打嘅文俾咗好多資訊我，好多謝你。
特別你介紹個計時app，之前睇好多介紹嘅文章都冇人講過呢樣嘢（可能我冇見到有🫣）真係好有用👍🏻箍之前好擔心自己嘅情況究竟隱適美做唔做到，你打嘅文除咗幫助之外仲帶到信心俾我🥹👍🏻
箍牙唔經唔覺原來都可以過左好耐，每個人情況唔同，
我都希望你可以盡快完成 已經快見到終點🙏🏻🙏🏻
Hello!!!!你好呀!!
多謝你嘅嘅分享! 好開心可以幫到你。
恭喜你呀可以開始戴固定器, 我都好期待有呢一日haha
有咬合問題食野都唔方便，反正唔使錢捱埋佢啦！我都開始箍咗第5個月啦，我都有排捱，岩岩覆完診牙醫話我有一隻牙有小小跟唔到進度，驚! 希望我地個箍牙旅程都順順利利， 大家一齊加油！！
冇錯呀，我都係咁諗！
加油一齊捱😆😆
Nia加油呀！我由你箍第一階段開始睇你個blog，俾左好多資訊我，令我都下定決心箍牙。
我又係戴得好足時間，想快D完成，牙醫都讚我進度良好haha~
最後我箍咗兩年半，依家戴咗retainer幾個月了，就嚟可以只戴夜晚，諗起都開心！
依家睇自己D牙齊咗上鏡靚咗，就覺得一切辛苦都值得！
我久唔久都會上你blog睇吓你既進度架 XD 希望你都快D完成第四階段，有棚靚靚又好用既牙啦！
多謝你呀，好感動呀！🥹🥹可以幫到你我都好開心😍
我會加油㗎喇，期待下我最後完成嗰個blog 啦！😆
謝謝你的分享, 我2年前剛開始箍牙時常有好多擔心, 你的blog 給了我好多資訊!
我有聽過有朋友大學時代箍, 都箍左4年, 整個大學生涯都左箍牙!!
我亦有另一個朋友早我兩年箍, 不過佢份人比較唔喜歡受束縛, 箍牙都係 XD, 每天只箍幾個鐘, 舊年見佢佢已經箍左4年,當時佢仲箍緊..
我都箍左快要2年, 現在在箍緊第2期, 唔肯定箍到幾時, D牙要用一世, 唯有堅持埋佢, 一起努力!!
多謝你話我知呀！好感動🥲原來我真係唔孤單🥹雖然有時係好期待快啲完，不過都冇得諗咁多，做好自己嗰part就夠，一齊加油呀💪🔥
Pingback: 【Nia箍牙|隱適美】Vol.26 磨牙後8個月 黑三角情況有改善嗎？ | nianiawuu