Blog

隱形牙套

姑娘一拎四盒牙套出黎我就開始吃不消，呢刻先知原來我要戴58副咁多…我仲以為係40幾副。

其後我問返診所，先發現原來醫生有改過個療程，之前個version原來已經係outdated既，我之後即刻問姑娘send返個updated既動畫我睇。

掉返轉諗，愈多副感覺療程愈抵，唯有係咁諗（苦笑）

每副牙套都係裝係個密封袋入面，袋上面清楚寫左Patient名、Patient編號、醫生名、第幾副。

每戴一副新既牙套就可以係袋上面寫低幾月幾日開始戴(不過我冇咁做)。

延伸閱讀：【好物分享】隱形牙套用家必備: 實用免費app TrayMinder Aligner Tracker – 牙套貼心小幫手

終於見到屬於自己既牙套喇，近睇會見到d 3D printing既紋路。

返到屋企我拎起呢副牙套望左好耐。

都係個句：好亂呀，條中線呢？

原來一直以黎旁人見到我d牙係咁樣，我到左而家先真正可以用其他人既角度，好好咁正視排牙。

雖然就咁睇副牙套都知邊個係上排邊個係下排，不過個牙套上都清楚寫左。

U: Upper ; L: Lower

反而U/L之後個數字就好有用喇，係指Stage number，即係第幾副。

U 01 N: 上排第一副
L 01 N: 下排第一副

 

The Invisalign® community

Welcome Kit入面本簡介書鼓勵用家可以join Invisalign Community Club：

「注冊成為隱適美用戶，您將能收到更多隱適美資訊及貼士。幫助你更輕鬆完成治療，收穫美好笑容！」

點知，我入左幾次資料都唔成功，咁我就inbox Invisalign Facebook page 查詢，原來呢個Club 並唔適用於香港地區，只係俾加拿大同美國既用家。

咁點解本書仲用埋中文同日文叫人註冊架呢？

 

唔見左副牙套點算？

如果唔見左，就要戴返上一副，確保牙齒既位置唔會走位先。

然後，同診所講返。重點係，加錢配返。

所以姑娘有以下建議：

• 留起前五副既牙套，萬一唔見左戴緊個副都可以戴返前一副。
• 每次除落黎之後要放入牙盒，唔好用紙巾包住，因為好易會被當係垃圾掉左。

延伸閱讀 ：【隱適美】外出必備用品分享

 

戴及除的方法

之後姑娘就開左第一副出黎教我點戴，上下排無先後次序之分 ：

對準門牙，輕輕按壓牙套於門牙，
然後使用指尖在後牙的區域慢慢用力按壓下去。

第一個感覺就覺得緊，但又未至於痛。因為姑娘話第一副牙套只係俾我適應，冇施壓既作用。

戴完之後就除喇：

用指尖在臼齒內側慢慢地從臼齒拉出牙套。

 

Chewies

每次戴牙套都要咬既Chewies。佢既作用係藉住咬既過程將牙套入面既空氣排出，令牙套可以更加貼服牙齒。

一包有兩舊，唔見左就同診所講返。重點係，加錢買返。

延伸閱讀：【隱適美】新手們一定要知道的10個重點

 

實戰時間

好喇，到左自己試既時間。戴就算容易，但除就有難度。

下排既牙套好難除，我覺得好唔就手，除左好耐。除完之後我隻手指仲有d 痛，睇黎真係要慢慢適應。

遲d 裝埋Attachment仲難除，仲要18粒，到時我咪死硬？

有關慘況可以參考【Nia箍牙|隱適美】Vol.7 終於裝上Attachment和拉橡筋！一個個意想不到的痛苦

 

注意事項

1. 食野同飲野都要除牙套，除左飲水之外。
2. 每日要戴20-22個鐘。
3. 每次食完野要刷牙，用牙線清潔牙齒（如果唔方便刷牙，就漱下口）。再用水沖洗下牙套先戴返（最好當然可以刷埋副牙套）。

 

牙套清潔及護理

姑娘仲有同我講點樣清潔牙套：

1. 每日用牙刷，擠少少牙膏刷牙套就可以。
2. 唔好用假牙清潔片/ 漱口水浸洗牙套，因為會損害牙套既表面。
3. 唔好用熱水浸洗，因為牙套會變形。

不過當我戴完一日，夜晚用牙刷擦完之後，都係覺得副牙套有d異味。

由於我有潔癖，接受唔到副牙套仲有味，我就上網search下有咩清潔方法。原來有專門洗牙套既產品，叫Retainer Brite。

佢聲稱可以「殺滅99％致病細菌及去除異味」，單單去除異味呢一點已經好吸引我。

不過好似係香港好難搵，暫時只可以搵到好少數賣家有賣，我見Amazon有賣就好衝動地一口氣買左4盒，每盒可以用到3個月。